Isabel Sánchez

2008-03-07T12:04:00.000-08:00

ESQUERDA UNIDA É O VOTO ÚTIL PARA POLÍTICAS DE ESQUERDA

Todos os votos de Esquerda Unida contan para acadar o 5% que permita a creación de grupo parlamentario.

Non deixedes de visualizar o video que se enlaza a continuación. Neste video demóstrase que o chamamento do PSOE ao "voto útil" en lugar de impedir o paso ao PP beneficiao en detrimento de Esquerda Unida.

http://es.youtube.com/watch?v=IAqk8w0KuuA

NECESARIA REFORMA DO SISTEMA ELECTORAL

Non existen sistemas electorais asépticos nin neutrais, e o sistema electoral español no é unha excepción. Foi elaborado no seu día para frear o ascenso electoral do PCE (Herrero de Miñón recoñeceu publicamente en xuño do ano pasado que se diseñou unha Lei electoral para prexudicar ao PCE) e aínda segue producindo o efecto para o que foi concebido. De feito, Esquerda Unida é a forza política máis prexudicada. Con este sistema, Izquierda Unida é a terceira forza estatal en votos con máis de 1.300.000 votos nas pasadas Eleccións Xerais de 2004, pero a sexta en número de escanos no Congreso.

A desproporcionalidade do sistema electoral é ben perceptible tendo en conta que os mellores resultados electorais de EU, acadados nas eleccións xerais de 1996, supuxeron 21 deputados malia ter conseguido o 10,54% (2.639.774 votos) que nun sistema proporcional resultarían 37 deputados. A correlación entre votos e escanos queda gravemente distorsionada, danando gravemente o principio de igualdade de voto que debe primar en calquera sistema electoral.

Adeais, o actual sistema electoral, desenvolto na Lei Orgánica 5/1985, de 19 de xuño, do Réxime Electoral Xeral, orixina un gran número de votos perdidos, tendo un índice de proporcionalidade moi baixo e sobrerrepresentando ás provincias con menor número de poboación sobre o resto.

O sistema electoral debe propiciar unha composición política do Congreso dos Deputados que respecte a proporcionalidade dos votos. Tres son os cambios básicos que debera recoller a nova Lei Electoral:

1. Aumentar a 400 do número total de escanos. O art. 68.1 da CE permite ampliar a un total de 400 os escanos do Congreso. Isto, podería facilitar a igualación do valor de cada voto en relación coa conquista dun escano se combínase cunha distinta fórmula electoral. Así mesmo, hai que entender que a poboación nestes últimos anos foi en aumento e, desta forma, a representación será máis proporcional á poboación actual.

2. Que a comunidade autónoma sustitúa á provincia como circunscrición electoral.

3. Limitar o número fixo de deputados por provincia. Tendo como circunscrición electoral a provincia, actualmente a Lei Electoral fixa en dous o mínimo de escanos para cada unha delas. IU propón reducir esa cota mínima a 1 escano por provincia, pasando o resto a distribuírse en función da poboación. Así substitúese o ‘peso das hectáreas polo das persoas'.

2008-03-07T11:59:00.000-08:00

MITIN EN LUGO

Hoxe celebramos o mitin en Lugo. Interveu en primeiro lugar a compañeira Paula Ínsua, que explicou as necesidades e propostas fundamentais da Mariña lucense. Continuou Carlos Portomeñe cunha intervención centrada no concello de Lugo e na necesidade de reforma do sistema electoral. A coordinadora nacional, Yolanda Díaz, incidiu nas propostas políticas de EU para Galicia, a política continuista do bipartito galego e a necesidade da presencia da nosa forza alternativa da esquerda no Congreso. Eu fixen un repaso das carencias fundamentais da provincia de Lugo e das propostas programáticas para atallalas, poñendo énfase na necesidade de avanzar na construcción dun estado federal republicano e laico.
Mañá instalaremos a carpa electoral e repartiremos programas na praza de Abastos pola mañán e na praza Maior pola tarde.

2008-03-05T02:15:00.001-08:00

2008-03-05T01:31:00.000-08:00

CONTRA A VIOLENCIA DE XÉNERO
Isabel Sánchez

Nun so día da pasada semán morreron asasinadas catro mulleres. Semella que estas catro mortes e as cerca de oitenta que asasinaron o ano pasado non son o suficientemente importantes, non son un problema de Estado para que se trate coa seriedade que se merece. Quizais por esta razón, porque estamos diante dun problema tan importante non fun quen de escribir ata hoxe sobre el. Non se pode ser políticamente correcta pero tampouco quixen parecer electoralista (por principios ideolóxicos isto está fóra do meu pensamento, pero acabamos por non facer cousas pensando o que van pensar os demáis…). A pesares de todo isto, paréceme de tal frivolidade o xeito co que se fala disto que é a miña obriga desgranar certas cuestións.
Despois de catro anos de goberno socialista e de grandes promesas no campo da igualdade de xénero, a realidade é ben distinta á que se prometeu.
Neste período o goberno estivo marcado por grandes titulares e dúas leis bandeira que escenificaron unha tintura violeta das políticas institucionais. Pola contra, estamos a ver a cada paso como isto non supuxo cambio estructural algún, pero o prezo é demasiado duro, xa que por una banda se trata de vidas e pola outra das esperanzas de moitas mulleres de vivir en un mundo de iguais.
Aprobáronse dúas grandes leis: a de igualdade e contra a violencia, e sen dúbida significan un avance nas políticas institucionais. Pero foi máis por aparencia, pola influencia que isto poidera transmitir ao conxunto da sociedade, pola influencia da prioridade política que poidera calar no conxunto dos diversos colectivos sociais, que polos avances ou medidas que realmente se puxeron en marcha. Ademáis é importante resaltar a ausencia de protagonismo e participación que o goberno actual posibilitou ao Movemento de mulleres. Boa mostra diso é a elaboración destas dúas leis, que se realizou de costas ás organizacións de mulleres, verdadeiras coñecedoras e protagonistas esenciais de calquera política que pretenda ser eficaz.

A Lei contra a violencia, a chamada lei integral
Nós apostabamos, en coincidencia coas organizacións de mulleres, por unha lei onde se incluísen medidas políticas que abordasen todos os aspectos estructurais de discriminación e de violencia que aínda seguen sufrindo as mulleres, para conseguir unha sociedade con valores de equidade e igualdade, onde a violencia non teña cabida. Unha lei que abordase todo tipo de violencia de xénero dun xeito realmente integral. Esta lei, en cambio, centrouse basicamente na violencia chamada doméstica e na súa penalización. Isto demostrou desgraciadamente que non foi eficaz, aínda que agora se empeñen en centrar que o fracaso da lei se debe a súa aplicación (da que tamén é responsable en gran medida o goberno). O seu fracaso débese a que non recolle medidas transversais contra a violencia de xénero.
Cando nos atopamos cun problema estructural debemos buscar a súa solución indo a raíz dese problema. Se falamos de violencia de xénero estamos a falar de que debemos cambiar o sistema patriarcal, porque este sistema é o que provoca as desigualdades, trasmitindo a longo dos anos uns roles, uns valores que foron e siguen mantendo esa desigualdade na nosa sociedade. A educación debe de ser un dos piares se se quere facer algo máis que una declaración de intencións.

A Lei de igualdade

A chamada Lei de igualdade non tivo maior transcendencia na súa aplicación. Só un apartado da mesma é o que se exportou como transcendente: "a paridade". O que o PSOE chama paridade non é o que reivindican as mulleres. Perdéuse unha grande oportunidade de plasmar a súa promesa de investidura de "facilitar o acceso ás mulleres ó poder", xa que o traballo ímprobo de representación paritaria que as mulleres estaban realizando, plasmouse legalmente na súa mínima expresión, e os resultados das eleccións municipais demostran que a porcentaxe de mulleres, aínda que subiu en relación con 2003, quédase por debaixo da mínima establecida do 40% (segundo datos da FEMP sitúase entorno ao 36%).
O resto da lei, centra a igualdade case en exclusiva no ámbito laboral e, dentro deste, na conciliación e a maternidade, esquecendo o resto dos ámbitos.
Á marxe destes dúas leis, outra das súas grandes promesas de investidura do actual goberno, foi a erradicación da desigualdade das mulleres, o fomento do emprego establecer e a accesibilidade ao mesmo. Podemos afirmar no día de hoxe, polos datos que nos achegan organismos europeos e comprobando as estatísticas, que a taxa de desemprego feminino é unha das maiores de Europa, que a desigualdade salarial entre homes e mulleres en traballos iguais, segue sendo unha realidade, que a discriminación por razón de sexo ou polo estado civil das mulleres segue sendo un condicionamento para o acceso ao emprego e que os traballos máis precarios, son os que destinan as empresas para as mulleres.
Outro dos seus piares da igualdade, a conciliación entre a vida laboral e familiar, de momento é unha expectativa. Os homes seguen sen compartir equitativamente as cargas familiares e as tarefas domésticas. Porque para que isto ocorra, non é só necesario leis que o regulen, senón tamén, e moito máis importante, crear unha conciencia social de igualdade que transforme a cultura patriarcal e sexista que aínda existe.
Mais a avaliación das políticas do goberno ben se podería resumir nun titular: "Promesas SEN orzamento". Moitas promesas pero nula plasmación orzamentaria, seguimos sendo o 0,1% dos presupostos Xerais do Estado.
Hai que tomar una serie de medidas destinadas a unha transformación real da nosa sociedade, onde as mulleres sexamos cidadás con todos os dereitos. Porque senón atopámonos que a pesares da aprobación e posta en marcha da Lei de Igualdade e a Lei integral contra a Violencia, a sociedade e as diferentes institucións seguen a tolerar que unha muller gañe ata un 40% menos polo mesmo traballo e coa mesma cualificación ( en Galicia ata 30% menos); que sexa despedida por razón de sexo; que sexa explotada sexualmente ou utilizada como obxecto nos medios publicitarios e de comunicación;...,un sistema que segue a segregar os traballos por razón de sexo e trasmitindo a través da educación valores, esteriotipos e roles que manteñen a visión das mulleres como cidadás de segunda ou terceira categoría.

2008-03-04T01:42:00.000-08:00

Estación de Lugo

PROPOSTAS DE ESQUERDA UNIDA SOBRE O TREN

O ferrocarril é o medio de transporte motorizado máis sustentable. Se comparamos o tren co automóbil e o camión, o tren consume menos enerxía, xenera menos gases de efecto invernadeiro, produce menos ruido, ocupa menos solo e ofrece máis seguridade que a estrada a igual número de viaxeiros ou de mercadorías e a igual percorrido. Un dato: unha doble vía de ferrocarril ten a mesma capacidade de transporte que 16 carrís de autoestrada, e un tren de mercadorías de 450 metros transporta o equivalente a 20 camións de grande tonelaxe.

Destes datos, evidenciase que para reducir o consumo enerxético é imprescindible reducir o transporte por estrada (e por avión) e incrementar o transporte ferroviario.

Esquerda Unida-IU aposta polo transporte por ferrocarril, pero non por calquera tipo de transporte ferroviario. Actualmente debemos distinguir entre dous modelos de transporte ferroviario a "alta velocidade" e a "velocidade alta". O modelo de alta velocidade debe ser rexeitado porque é un modelo insustentable, elitista e non dá o servizo social que precisa Galicia.

Os trens de alta velocidade realizan un consumo enerxético desproporcionado e insoportable. O tren AVE que circula entre Madrid e Sevilla a unha velocidad máxima de 300 km/h e a unha velocidad media máxima de 209 km/h, ten unha potencia de 8.800 kW. Este tren AVE, con oito coches e dúas cabezas motrices e que transporta 329 viaxeiros, consume tanta electricidade, medida en kilovatios/hora, como unha cidade de 25.000 habitantes.

Con todo, o modelo de alta velocidade para Galicia non é tal porque, se realmente tivese os apeadeiros que se están a dicir, nunca acadará velocidades superiores aos 250 km/h que é cando podemos empezar a falar de altas velocidades.

Para acadar estas velocidades necesítase moito percorrido de aceleración para que o convoio alcance a alta velocidade e, por suposto, tamén para frenalo unha vez acadada as ditas velocidades.

Deficiencias do tren en Lugo

A rede ferroviaria de RENFE en Lugo caracterizase por ter os seguintes problemas:

a) As conexións co resto da Península son moi limitadas. Só quedan dous trens nocturnos: o Estrella Atlántico (que vai a Madrid) e o Estrella Galicia (que chega ata Barcelona). Os sábados non existe un tren que conecte Lugo coa Meseta.

b) Unha rede sen electrificar e sen doble vía.

c) Unha rede con pendentes pronunciadas; tódalas líñas contan con pendentes superiores ou iguais a 15 milésimas.

d) Unha rede salpicada por túneis e pasos a nivel.

e) Como consecuencia de todo o anterior, trátase dunha rede na que se desenvolven velocidades reducidas, con tramos nos que a velocidade máxima non supera os 80 km/h; todo isto penaliza os tempos de viaxe, facendo pouco atractiva a oferta de transporte de viaxeiros. A modo de exemplo, a velocidade comercial do servizo máis rápido entre A Coruña e Lugo é de 63 km/h. O servizo Lugo-Madrid emprega tres horas en saír de Galicia, cun cambio de máquina diésel a eléctrica en Monforte.

f) Unha rede especialmente sinuosa, incluso para a media peninsular, posto que inclúe aproximadamente o 40% das curvas de radio menor ou igual de 300 m e case o 20% das curvas de radio menor ou igual a 500 m de toda a rede de RENFE, sendo a súa lonxitude tan só o 7,2% do total.

Esquerda Unida considera demagóxica as promesas de PSOE, PP e BNG sobre un tren de alta velocidade que nunca chegará a Lugo; partidos que só se lembran do tren en campañas electorais mentres defenden un modelo desarrollista que con base en autovías e infraestructuras megalómanas que favorecen o crecemento do transporte privado fronte ao público. Incluso é unha incorrección denominar AVE á alta velocidade, cando é tan só unha marca comercial que nada ten que ver co que din proxectar.

PROPOSTAS

Considerando todo o anterior, Esquerda Unida propón:

- A construcción dunha liña ferroviaria Santiago de Compostela - Lugo - Ribadeo. Facilitaría o transporte colectivo reducindo enormemente o privado, permitiría unha ponte mái s pequena sobre o Miño, ademais do desenvolvemento turístico unindo os dous Patrimonios da Humanidade que hai en Galicia.

- Soterramento das vías na estación do tren.

- Iniciar o proceso de modernización do tren, electrificando a liña.

- Rexeitar o modelo de alta velocidade por ser elitista, insustentable e non vertebrador do país.

- Defender e apoiar as políticas e colectivos sociais que, coma nós, aposten por un ferrocarril público e social, seguro e sustentable.

- Aplicación das normas para que o transporte de mercadorías perigosas se realice por ferrocarril.

2008-03-03T01:53:00.000-08:00

ENTREVISTA A ISABEL SÁNCHEZ

Luns 3 de marzo, a Cadena Ser entrevista á candidata de Esquerda Unida en directo no programa "Club de debate"

Horario: de 19:10 a 19:50

2008-03-02T14:20:00.001-08:00

Isabel e Carlos Castro

HOXE ESTIVEMOS EN CHANTADA, NA FEIRA DO VIÑO

Hoxe repartimos programas en Chantada, onde se celebraba a Feira do Viño. Visitamos os pabellóns e postos da feira, participamos dun xantar de confraternidade e, como non, tamén degustamos o bo viño chantadino.

2008-03-01T15:38:00.000-08:00

ACTOS DOMINGO 2 DE MARZO

12:00 Isabel Sánchez, Alba Cela, Carlos Portomeñe e outros integrantes da candidatura visitan Chantada, onde entregarán programas electorais na carpa de Esquerda Unida.

2008-03-01T09:28:00.000-08:00

EXPLICANDO O PROGRAMA NA RÚA DA RAÍÑA, EN LUGO

Hoxe sábado instalamos a carpa de Esquerda Unida na rúa da Raíña, onde repartimos o programa electoral. Esta rúa foi chamada durante a II República rúa da Liberdade, pero eses tempos foron truncados por un golpe militar.
Desde EU-IU exiximos que de forma inmediata se cambien os símbolos fascistas así como os nomes das rúas que ensalzan a persoas ou datas que lembran unha etapa que sumiu a nosa sociedade durante corenta anos na barbarie e a represión continuada. E utilizamos o verbo esixir porque o único que teñen que facer é cumprir coa Lei.
Cómpre lembrar para non esquecer. Unha sociedade xusta debe aprender dos acertos e erros do seu pasado. Pero sobre todo, debe asentarse en preservar a dignidade das persoas que, debido a un golpe de Estado e a un mal esquecemento, aínda agardan unha plena reparación de dita dignidade.
Por iso pedimos, entre outros:
· a adhesión do Estado español á Convención da ONU sobre imprescriptibilidade dos crimes de guerra e dos crimes de lesa humanidade.
· a creación do Instituto para a Memoria Histórica, a reconversión do Val dos Caídos nun Centro de Interpretación da represión da ditadura franquista e o traslado dos restos mortais de Franco e Primo de Rivera ao lugar onde propoñan os seus familiares.
· a declaración do 18 de xullo como día oficial de condena á ditadura franquista. Esixencia de que as actuacións de localización, exhumación e identificación das fosas ou enterramentos das vítimas do franquismo se fagan por parte das AAPP.
· a creación unha Fiscalía especializada nas violacións dos dereitos humanos e do dereito humanitario durante a Guerra Civil e o réxime franquista.
· a declaración de nulidade radical de todas as condenas, sentenzas e resolucións ditadas polos tribunais franquistas a proposta da Fiscalía.

2008-02-29T07:23:00.000-08:00

REPARTO DE PROGRAMAS NA FEIRA DE FRIGSA

Hoxe estivemos na feira de Frigsa repartindo propaganda electoral. Falando coa xente poidemos comprobar algo que Esquerda Unida leva tempo denunciando: a perda do poder adquisitivo dos traballadores e traballadoras, a carestía da vida e o aumento do prezo dos productos básicos de consumo diario. Moita xente asegurounos que asiste con frecuencia a este mercado porque os prezos aínda son asequibles e ás veces poden atopar "gangas".

Tamén se percibe a contradicción das persoas que din aquelo de "todos son iguais" e despois votan en tropel aos partidos que lles manteñen pensións indignas ou precarizan o emprego con constantes "contrarreformas laborais".
A este tipo de mercados acude un alto número de persoas maiores, que buscan aforrar o posible para chegar a fin de mes coa súa precaria pensión. De feito, a pensión media na provincia de Lugo é de 478 euros ao mes, 160 euros menos ca no resto do Estado. E sempre falando de media, polo que podemos deducir cal é a cuantía das pensións máis baixas. Só o patrimonio en Bolsa do presidente de INDITEX equivale á renda anual dun millón de galegos e galegas. Mentres, o Banco Santander gañou un 19,3% de beneficios netos, 9.030 millóns de euros; Botín di que a economía vai ben pero, para quen?
Só existe unha solución: redistribución da riqueza.

2008-02-28T06:03:00.000-08:00

YOLANDA DÍAZ, COORDINADORA XERAL DE EU, ESIXE A REFORMA DO SISTEMA ELECTORAL

2008-02-28T04:07:00.000-08:00

ESQUERDA UNIDA DEFENDE O DEREITO A UNHA VIVENDA DIGNA DE TODAS AS PERSOAS
A vivenda é un dereito co que é indecente facer negocio

Resulta indignante que os grandes medios de comunicación e os partidos políticos maioritarios, envoltos no tedioso circo electoral de acusacións mutuas sen contido, gardasen silencio acerca do informe do observador da ONU Miloon Kothari sobre a situación da vivenda en España, presentado o 7 de febreiro de 2008. En tal informe constátanse importantes aspectos:

máis dunha cuarta parte dos ingresos dos concellos españois proveñen da especulación inmobiliaria, pola vía primordialmente da dilapidación de patrimonio de chan público imprescindible para garantir o dereito á vivenda. O orzamento do Concello de Lugo, por exemplo, superou os 100 millóns de euros grazas a esta política.
existen máis de tres millóns de vivendas baleiras nun país no que perto de oito millóns de persoas ven negado o seu dereito elemental a un teito. Na cidade de Lugo existen máis de 15.000 vivendas baleiras, máis de 1 de cada 4.
as desgravacións fiscais para a vivenda en propiedade agravaron o problema e provocaron constantes elevacións de prezos.
a inexistencia de parques de vivenda pública en aluguer.
a especulación salvaxe das últimas dúas décadas, ademais de negar este dereito básico a millóns de cidadáns e xerar en cambio beneficios obscenamente multimillonarios para uns poucos, levou a unha destrución escandalosa do territorio e o contorno natural. O novo PXOM de Lugo contempla na súa memoria a construción de 76.000 novas vivendas, só en zona urbana; un plan continuista do PGOU elaborado polo PP a principios dos noventa.

O observador da ONU advirte de que a situación é insostible e reclama das autoridades españolas que informen á cidadanía da súa gravidade e se comprometan a aplicar medidas urxentes e drásticas para corrixila.

E a resposta das autoridades, das grandes partidos políticos e da inmensa maioría de medios de comunicación foi o silencio, un silencio culpable. Estes son os problemas sociais que os políticos deben discutir nas campañas electorais se non se quere que as campañas se conviertan nunha feira de vanidades e hipocrisías.

Aínda peor, o goberno do PSOE negocia co G14, o grupo representativo dos construtores e promotores inmobiliarios (os beneficiarios e causantes principais da catástrofe) medidas que freen as súas posibles perdas de beneficios pola crise do sector. É dicir, non lle preocupa o dereito á vivenda senón o lucro dos grandes capitalistas. Un feito semellante ao que sucede na nosa provincia.

Esquerda Unida quere elevar a súa voz xunto a todas as demais voces que denuncian o estado de cousas actual e comparte tanto o diagnóstico como as reivindicacións básicas que o movemento pola vivenda digna expón.

O único camiño para garantir o dereito á vivenda é o da constitución dun parque de vivenda pública en aluguer a prezos accesibles para todas as persoas sen ter que hipotecar a súa vida. É inaprazable acometer medidas audaces de uso social das vivendas baleiras como gravar con fortes impostos á vivenda vacante ou a expropiación de vivendas baleiras de protección oficial ou subvencionadas con diñeiro público por reducións fiscais, coas que se está especulando sen control algún. Faise necesario deter radicalmente o perverso proceso de urbanización salvaxe e proponerse unha mudanza de fondo do modelo produtivo destrutor da natureza e dos dereitos sociais. Débese abordar a política desenvolvida pola inmensa maioría dos concellos, entre eles o lucense, e deter a dinámica de dilapidación de patrimonio de solo público. Urxe unha reforma a fondo da fiscalidade das corporacións locais e garantir na práctica o cumprimento efectivo do mandamento constitucional de participación da comunidade nas plusvalías xeradas pola acción urbanística dos entes públicos. Hai que esixir un urbanismo integramente público.

A vivenda debe quedar fóra do mercado, porque a vivenda é un dereito co que é indecente facer negocio. Polo dereito a unha vivenda digna para todas as persoas, sigamos coa loita na rúa.

"86. A pesar de que en las disposiciones de la Constitución se reconoce que la vivienda es un derecho básico, en la práctica es considerada un simple bien de consumo, que se compra y se vende. En este contexto, debe recuperarse la función social de la vivienda y aplicarse plenamente el artículo 47 de la Constitución. Todos los sectores de la sociedad, incluidos los promotores inmobiliarios, los constructores, las agencias inmobiliarias, los grupos de la sociedad civil y otros agentes de los sectores público y privado, deben participar en la realización de este derecho humano básico".

Conclusión e recomendación recollida no Informe do Relator Especial da ONU, Sr. Miloon Kothari, sobre unha vivenda digna como elemento integrante do dereito a un nivel de vida digno, solicitada polo goberno español.

2008-02-26T14:56:00.000-08:00

VIDEO DO INICIO DE CAMPAÑA CON ARTE

Xa podedes ver o video do inicio de campaña de Esquerda Unida de Lugo, coa elaboración do mural, música e compromiso.

2008-02-26T04:50:00.000-08:00

PRESENTACIÓN DOS 20 PUNTOS PARA UN PROGRAMA DE ESQUERDAS.

Hoxe presentamos en rolda de prensa as propostas alternativas de Esquerda Unida. Propostas de traballo nas que intentamos resolver os problemas dos cidadáns e cidadás. Para Esquerda Unida é fundamental que as persoas prevalezan sempre por riba do capital; non somos meros instrumentos nin meros consumidores. Por iso debemos voltar a voz ó pobo e dotarlo dos instrumentos necesarios para facer efectiva a democracia. Para elo desde Esquerda Unida apostamos pola reforma da Lei Electoral, garantindo así a representatividade e proporcionalidade dos resultados electorais. Pero tamén unha lei de Democracia participativa acompañada dun claro fortalecemento do movemento asociativo.

Destacamos algo para nós fundamental cando falamos de igualdade de oportunidades, que é unha fiscalidade xusta é progresiva, reformando o IRPF e redistribuindo a carga fiscal sobre quen gaña máis.

Polo de agora todos e todas dámonos conta dos beneficios que teñen para nós e para o conxunto da sociedade os servicios públicos: educación, sanidade, servicios sociais. Unha sociedade con cidadáns e cidadás formados para exercer os seus deberes e esixir os seus dereitos, unha sociedade sana, unha sociedade que coida dos seus maiores e que abandera a igualdade, será unha sociedade que avanza cara a xustiza e a igualdade, cara á integración dos máis desfavorecidos/as, unha sociedade en definitiva que rexeite todo tipo de violencia, tanto económica como as diferentes manifestacións desta.

Non podemos quedarnos impasibles ante a progresiva privatización do ensino e a sanidade. Pola contra, debemos profundizar na súa mellora e esixir ademáis un ensino laico e de calidade, unha nova Lei de Sanidade e, por suposto, a xestión pública dos servicios públicos.

Destacamos na nosa intervención de hoxe que para nós é urxente un plan contra a precariedade laboral. Que loite polo emprego estable, de calidade e a tempo completo. Queremos que se tipifique como delito o incumprimento sistemático e flagrante da Lei de prevención de riscos laborais. E non renunciamos á reducción da xornada laboral de 35 horas por lei sen reducción salarial.

Ademais, as mulleresos e homes e de EU temos un compromiso co noso entorno, co medio onde vivimos e co planeta. Sabemos que o binomio capitalismo-sostenibilidade é unha falacia. Debemos realizar xa un plan urxente contra o cambio climático e unha lei de aforro e eficiencia enerxética. O peche das centrais nucleares (plan para 25 anos). En Galicia isto pasa pola preservación dos espazos naturais, a recuperacion das rías, a ordenación do litoral e do territorio (apostando por infraestructuras menos dañinas como o tren). Non queremos plantas de gas nas nosas rías, nin furados nos montes debido ás explotacións mineiras; o que si queremos é unha alternativa ecolóxica a este problema.

Ainda que temos moitas máis propostas que seguiremos explicando, este primeiro achegamento fecharíase coa loita pola igualdade de dereitos reflectida nun Estado Federal, Republicano, Solidario e Laico, dotándonos dun instrumento de participación como é o referendo co que decidiriamos a forma política do Estado: Monarquía ou República.

2008-02-25T08:44:00.000-08:00

RODA DE PRENSA

Mañá martes 26 de febreiro ás 12:30 na sede de Esquerda Unida (Carril do Son, 3- 1º), presentaremos en roda de prensa os 20 PUNTOS PARA UN PROGRAMA DE ESQUERDAS.

Falaremos:

ISABEL SÁNCHEZ, cabeza de lista ao Congreso por Lugo
CARLOS ANXO PORTOMEÑE, secretario nacional de Política Institucional
CARLOS CASTRO, membro do Consello local de Lugo

2008-02-25T08:13:00.000-08:00

Isabel Sánchez e Alba cela diante dos Escolapios de Monforte

ISABEL SÁNCHEZ EN SARRIA E MONFORTE

Acompañada doutros integrantes da candidatura e militantes visitei Sarria e Monforte de Lemos. Alí repartimos propaganda e recorremos as rúas das dúas vilas, charlando, dialogando e explicando as propostas programáticas de Esquerda Unida. Poidemos comprobar problemas como o paro, o abandono e a emigración, así como a desarticulación do ferrocarril, que son unha constante no sur da nosa provincia.
Daí que as nosas propostas sobre o tren, ben coñecidas desde hai anos, sobre emprego, para os maiores, entre outras, tivesen unha boa acollida entre a cidadanía. Son aspectos recollidos nos 20 PUNTOS PARA UN PROGRAMA DE ESQUERDAS que o martes 26 presentaremos en roda de prensa.

2008-02-23T10:38:00.000-08:00

Isabel Sánchez, coa coordinadora nacional,Yolanda Díaz,
e o secretario de organización, Xabier Ron

PROPOSTAS E ALTERNATIVAS DE ESQUERDA UNIDA FRENTE AO "CIRCO ELECTORAL"

Neste inicio de campaña, unha vez máis, Esquerda Unida quere denunciar o déficit democrático existente na nosa sociedade relegando aos cidadáns e cidadás a meros consumidores de propostas peregrinas que se lle ocorren ao político de turno nun intento de gañar votos. Pero as propostas que intentan gañar un voto por catrocentos euros ou un cheque asistencial agachan algo moi perverso: a privatización dos servicios públicos e sociais, un fenómeno que está a xerar cada vez máis desigualdades entre ricos e pobres e unha bolsa de pobreza que cada vez se enche de máis colectivos.
Cando non se fala de política, cando se oculta a verdadeira política económica que se leva a cabo, cando interesadamente se desinforma sobre outras alternativas, o espello onde nos podemos mirar xa é unha sociedade onde se instala o bipartidismo, onde os políticos non falan, en serio, dos problemas dos traballadores/as, da carestía da vida, etc., senón que amosan diferentes "circos" para entreternos durante pensando que malos son uns e que "inxenuos" outros.
EU quere un debate de ideas, proxectos, cambiosque melloren a vida de todos e de todas e nos saquen deste retroceso que esta colocando ó ser humano por debaixo de calquera interés económico. As nosas propostas pretenden transformar unha realidade inxusta, que hipoteca as nosa vidas, que non nos deixa decidir sobre o noso futuro.
A nosa voz non pode calar que non é de esquerdas baixar os impostos. De esquerdas é loitar pola xustiza fiscal que permita promover políticas sociais de alcance universal. No último ano deixáronse de recaudar 6000 millóns de euros, en cambio a pensión media dun maior na provincia de Lugo é de 478 euros.
Non é de esquerdas limitar os dereitos e proclamar recoñecementos sobre o papel sen posibilidades de que se cumpran (as empregadas do fogar ainda están esperando, despois de tanto anuncio, a súa inclusión no réxime xeral da seguridade social). O que si é de esquerdas é impulsar os dereitos, e asegurar mediante os poderes públicos e os orzamentos necesarios o seu cumprimento. "Vivir mellor" non pode ser unha frase feita; para poder facelo os membros da comunidade deben poder acceder a unha vivenda digna, a unha educación pública, laica e de calidade e unha sanidade pública que necesita máis investimentos.
Semella que tampouco é demasiado de esquerdas flexibilizar e desregularizar o mercado laboral, así como privatizar os servicios públicos. Cando falamos de ser de esquerdas en materia laboral, falamos de asegurar o traballo estable con garantías laborais e sindicais, con salarios xustos e que respondan á de premisa igual traballo igual salario. En definitiva, con dereitos que fagan certo o de" traballar para vivir" e "non vivir para traballar".
Non podemos condear a millóns de persoas á irregularidade, ao medo permanente, a un mundo sen dereitos e dicir que facemos política de esquerdas. Pola contra, desde a esquerda debemos promover os dereitos humanos para todos e todas, porque "a Terra non ten dono e ningún ser humano é ilegal".
Non é de esquerdas facer unha política Internacional fundamentada na dobre moral do " non a guerra de Irak" pero sí "misión humanitaria en Afganistán".
Nada disto é de esquerdas, pero menos aínda é admitir o capitalismo como único sistema válido, fomentándose así a producción incontrolada, o consumismo e o desenvolvismo que aparte de xerar innumerables desigualdades sociais (paro, pobreza, violencia, desregularización, ...) destrúe o planeta; e sen nigún rubor a renglón seguido fálase de sostenibilidade e do protocolo de Kioto. Capitalismo e sostenibilidade son incompatibles. Partindo distos o que si é de esquerdas e o prantexamento de que debemos cambiar XA o modelo de producción e consumo antes de que nos engulla.
Para Esquerda Unida fundamental posibilitar a participación da cidadanía e profundizar na democracia, facendo que as institucións se abran a sociedade. Onde todos e todas sexamos cidadáns sen privilexios, cos nosos dereitos e deberes. Por esa razón unha vez máis pensamos que o modelo de Estado Federal e Republicano recollería e posibilitaría todo isto.

Isabel Sánchez Corral

2008-02-23T10:35:00.000-08:00

PREVISIÓN ACTOS ELECTORAIS SÁBADO 23 DE FEBREIRO

12:30 SARRIA. Isabel Sánchez e outros integrantes da candidatura visitan Sarria e repartirán propaganda polo malecón e outras zonas da vila.

17:00 MONFORTE. Isabel Sánchez e outros integrantes da candidatura visitan Monforte e repartirán propaganda pola rúa Cardenal e outras zonas da vila.

2008-02-22T09:59:00.000-08:00

Isabel Sánchez pegando o cartel de campaña

ESQUERDA UNIDA INICIOU A CAMPAÑA ELECTORAL CON ARTE E COMPROMISO

Esquerda Unida iniciou a campaña electoral cun acto que reuniu a decenas de militantes e simpatizantes na praza do Campo Castelo e no que, ademais da tradicional pegada de cartel electoral, contouse con animación musical e a elaboración dun mural en directo que unha vez máis amosaron o carácter alternativo de EU, que utiliza a creatividade lonxe das campañs mediáticas e o derroche de cartos dos partidos que sosteñen o sistema.

Bárbara pinchando música

A cabeza de lista ao Congreso por Lugo, Isabel Sánchez, pegou o cartel de campaña no propio mural colaborando así cunha obra que reflexa o compromiso de Esquerda Unida na loita contra a especulación inmobiliaria e a defensa do medio ambiente.

Isabel e Pablo diante do mural

2008-02-20T15:58:00.000-08:00

INICIO DE CAMPAÑA

A PARTIR DAS 23:30 DA NOITE NA PRAZA DE CAMPO CASTELO

UN INICIO DE CAMPAÑA CON ARTE E CULTURA

Instalarase unha carpa con música en directo e DJ
Un artista lucense realizará un mural en directo no que poderán colaborar os/as presentes

PEGADA DE CARTEL

Posteriormente, ISABEL SÁNCHEZ CORRAL, cabeza de lista pola provincia de Lugo, acompañada doutros membros da candidatura, militantes e simpatizantes de ESQUERDA UNIDA, realizará a pegada do primeiro cartel da campaña electoral

2008-02-19T15:40:00.000-08:00

ISABEL SÁNCHEZ PARTICIPOU NA MANIFESTACIÓN DE GALIZA NON SE VENDE

Unhas 10.000 persoas acudiron á convocatoria do movemento Galiza Non Se Vende para manifestarse contra a destrución do territorio. O acto encheu as rúas de Compostela e a Praza da Quintana na que se leu o comunicado final. Dende hai moitos anos non se lembraba en Compostela unha marcha tan multitudinaria como a do domingo día 17. O ano pasado, o mesmo movemento, denominado Rede Litoral vivo, logrou convocar a 4000 persoas baixo o lema “Galiza non se vende”.

As reivindicacións tiveron como denominador común a defensa do territorio galego, ameazado por innumerabeis proxectos que, lonxe de procurar riqueza, esquilman os recursos naturais. Durante o traxecto, festivo e reivindicativo, os representantes de Burla Negra, paroriando aos membros do goberno, rebautizaron diversas rúas da cidade: rúa do doutor Tojeiro, rúa do Villar Mir, rúa do Bipartito… os asistentes procedían de toda Galiza. Das vilas mariñeiras sobre as que pende a ameaza das piscifactorias; do Courel; Lugo; Ferrol e Mugardos, sempre fieles á cita; Pontedeume; Ortigueira; o Ribeiro e un longo etcétera.

2008-02-19T14:43:00.000-08:00

ISABEL SÁNCHEZ ENCABEZA A CANDIDATURA DE ESQUERDA UNIDA AO CONGRESO POLA PROVINCIA DE LUGO

A Secretaria Nacional de Muller de Esquerda Unida e membro do Comité federal do PCE, Isabel Sánchez Corral, será a cabeza de lista ao Congreso dos Deputados pola provincia de Lugo nas vindeiras eleccións xerais do 9 de marzo.

O resto da candidatura é a seguinte:

ESQUERDA UNIDA-IZQUIERDA UNIDA (EU-IU)

1. MARÍA ISABEL SÁNCHEZ CORRAL
2. CARLOS NOVO PÉREZ-SINDÍN
3. MARÍA SOLIÑA BARREIRO GONZÁLEZ
4. AMARO RODRÍGUEZ CARRETERO

Suplentes
ALBA EXPÓSITO GÓMEZ
ALEJANDRO RODRÍGUEZ ROBLEDILLO
ÁNGEL SEIJAS DIÉGUEZ